News

മയക്കുമരുന്നിനെതിരെ യുവതയുടെ സർഗാത്മക ശബ്ദം: ‘ തൂഫാൻ ഗോൾ ’ റീൽസ് മത്സരം

യുവതലമുറയെയും വിദ്യാർത്ഥികളെയും മയക്കുമരുന്നിന്റെ അപകടങ്ങളിൽ നിന്ന് അകറ്റി കായിക-സർഗാത്മക പ്രവർത്തനങ്ങളിലേക്ക് നയിക്കുക എന്ന ലക്ഷ്യത്തോടെ വേൾഡ് മലയാളി കൗൺസിലിന്റെ ഗ്ലോബൽ യൂത്ത് കൗൺസിൽ വൈ എം സി എ , ലയൺസ് ക്ലബ്  എന്നിവരുടെ സഹകരണത്തോടെ സംഘടിപ്പിക്കുന്ന ലഹരിവിരുദ്ധ ക്യാമ്പയിനായ “ തൂഫാൻ ഗോൾ” ന്റെ ഭാഗമായി ആഗോളതല റീൽസ് മത്സരം സംഘടിപ്പിക്കുന്നു.

“ സെ നോ ടു ഡ്രഗ്സ്   സ്പോർട്സ് ഈസ്  ഔർ സ്പിരിറ്റ് ” എന്ന സന്ദേശം സമൂഹത്തിലേക്ക് ശക്തമായി എത്തിക്കുകയാണ് മത്സരത്തിന്റെ ലക്ഷ്യം. ലഹരിക്കെതിരായ ബോധവൽക്കരണം പ്രമേയമാക്കി തയ്യാറാക്കുന്ന ക്രിയാത്മകവും സന്ദേശപ്രധാനവുമായ റീലുകൾ മത്സരത്തിനായി സമർപ്പിക്കാം.

മികച്ച റീലിന് സ്വ ഡയമണ്ട് സ്പോൺസർ ചെയ്യുന്ന ഡയമണ്ട് റിംഗ് ഒന്നാം സമ്മാനമായി നൽകും. സോഷ്യൽ മീഡിയയുടെ സ്വാധീനം ഉപയോഗപ്പെടുത്തി ലഹരിവിരുദ്ധ സന്ദേശം യുവജനങ്ങളിലേക്കും പൊതുസമൂഹത്തിലേക്കും വ്യാപകമായി എത്തിക്കാനാണ് ഈ മത്സരത്തിലൂടെ ലക്ഷ്യമിടുന്നത്.

റീൽസ് മത്സരത്തിനുള്ള രജിസ്ട്രേഷൻ 2026 സെപ്റ്റംബർ 25-നകം പൂർത്തിയാക്കണം. മത്സര റീലുകൾ സെപ്റ്റംബർ 30-നകം സമർപ്പിക്കണം. കൂടുതൽ വിവരങ്ങൾക്കും രെജിസ്ട്രേഷനും www.worldmalayaleecouncil.net എന്ന വെബ് സൈറ്റ് സന്ദർശിക്കുക.

വേൾഡ് മലയാളി കൗൺസിൽ ഗ്ലോബൽ ചെയർമാൻ ഡോ. ഐസക് ജോൺ പട്ടാണിപ്പറമ്പിൽ, ഗ്ലോബൽ പ്രസിഡന്റ് ബേബി മാത്യു സോമതീരം, ഗ്ലോബൽ യൂത്ത് കൗൺസിൽ പ്രസിഡന്റ് അഡ്വ. ഫെലിക്സ് ജോണി കുരുവിള എന്നിവർ പരിപാടിക്ക് നേതൃത്വം നൽകുന്നു.

യുവതലമുറയെ ലഹരിയിൽ നിന്ന് സംരക്ഷിക്കുന്നതിനുള്ള സാമൂഹിക ഉത്തരവാദിത്വത്തിൽ എല്ലാവരും പങ്കാളികളാകണമെന്നും ‘ തൂഫാൻ ഗോൾ’ ലഹരിക്കെതിരായ ശക്തമായ ജനകീയ സന്ദേശമായി മാറണമെന്നും സംഘാടകർ അഭ്യർത്ഥിച്ചു.