Photo-Shoot

റിയാലിറ്റി ഷോയിലൂടെ കടന്നു വന്ന് പ്രേക്ഷകരുടെ പ്രിയതാരമായി മാറിയ ആളാണ് ദിൽഷ പ്രസന്നൻ.ബി​ഗ് ബോസ് മലയാളം ചരിത്രത്തിലെ ആദ്യ വനിത ടൈറ്റിൽ വിന്നർ കൂടിയാണ് ദില്‍ഷ. ഷോയുടെ അകത്തും പുറത്തും ദിൽഷയുടെ പേരിൽ നിരവധി വിവാദങ്ങളും വാർത്തകളും ഉണ്ടായിട്ടുണ്ട്. എന്നാൽ അതിലൊന്നും ഇടപെടാതെ തന്റെ സ്വപ്നങ്ങളുടെ പിന്നാലെയാണ് ദിൽഷ ഇപ്പോൾ.

ബിഗ്‌ബോസിൽ നിന്നും വന്നതിന് പിന്നാലെ ഫോട്ടോഷൂട്ടുകളും മറ്റുമായി സോഷ്യൽ മീഡിയയിൽ സജീവമാണ് താരം. ഇപ്പോഴിതാ ദിൽഷ പങ്കുവച്ച പുത്തൻ ഫോട്ടോഷൂട്ടാണ് സോഷ്യൽ മീഡിയയിൽ  തരംഗമാകുന്നത്.

ഭദ്ര കാളി ആയാണ് ദിൽഷയുടെ വേഷപ്പകർച്ച. ദിൽഷ തന്നെയാണോ ഇതെന്നാണ് ആരാധകർ ചോദിക്കുന്നത്. കാരണം അത്രയും ഗംഭീരമാണ് ദിൽഷയുടെ കാളിയായുള്ള മേക്കോവർ. നിരവധി പേരാണ് ചിത്രത്തിനു കമന്റുകളുമായി രം​ഗത്തെത്തിയിരിക്കുന്നത്. 

'അനീതിക്കെതിരെ പോരാടുന്നത് എല്ലായ്‌പ്പോഴും എളുപ്പമുള്ള കാര്യമല്ല. എന്നാൽ രാക്ഷസൻമാരെ തകർക്കുന്ന കാര്യത്തിൽ അവൾ ധീരയും ഭയമില്ലാത്തവളുമാണ്. മാ കാളിയുടെ ഒരു എളിയ പുനരാവിഷ്കരണം' എന്നാണ് ദിൽഷ ചിത്രത്തിന് നൽകിയിരിക്കുന്ന ക്യാപ്ഷൻ. പ്രശസ്ത ഫോട്ടോഗ്രാഫറായ മഹാദേവൻ തമ്പിയാണ് ഈ ഫോട്ടോഷൂട്ടിന് പിന്നിൽ പ്രവര്‍ത്തിച്ചിരിക്കുന്നത്. 

'ഡി ഫോർ ഡാൻസ്' എന്ന റിയാലിറ്റി ഷോയിലൂടെയാണ് കോഴിക്കോട്ട്കാരി ദിൽഷ മിനിസ്‌ക്രീനിൽ ശ്രദ്ധേയയായത്. ശേഷം ഈ മേഖലയിൽ നിന്നും ഇടവേള എടുത്ത ദിൽഷ, ബിഗ്‌ബോസ് ഷോയിലൂടെയാണ് തന്റെ രണ്ടാം വരവ് നടത്തിയത്. 

ദിൽഷയുടെ പുത്തൻ ഫോട്ടോഷൂട്ട് ഇതിനോടകം ആരാധകർക്കിടയിലും സോഷ്യൽ മീഡിയയിലും വൈറലായി മാറിയിട്ടുണ്ട്.