Trailer

ഏറെ പ്രതീക്ഷയോടെ കാത്തിരിക്കുന്ന 'ഇന്ത്യന്‍ പ്രിഡേറ്റര്‍: ഡയറി ഓഫ് എ സീരിയല്‍ കില്ലറി'ന്റെ ട്രെയിലര്‍ പുറത്തിറങ്ങി. ഇന്ത്യാ ടുഡേ ഒറിജിനല്‍സ് സംരംഭത്തിന്റെ ഡോക്യുമെന്ററി പരമ്പരയാണിത്. ഒരു പത്രപ്രവര്‍ത്തകന്റെ കൊലപാതകത്തെയും പ്രതിയായ നരഭോജി രാജാ കൊളന്ദറിനെയും ചുറ്റിപ്പറ്റിയുള്ള കഥയാണ് 'ഇന്ത്യന്‍ പ്രിഡേറ്റര്‍: ഡയറി ഓഫ് എ സീരിയല്‍ കില്ലര്‍' പറയുന്നത്. സെപ്റ്റംബര്‍ 7ന് നെറ്റ്ഫ്‌ലിക്‌സിലൂടെയാണ് റിലീസ്. 

ഒരു മാദ്ധ്യമ പ്രവര്‍ത്തകന്‍ ഉള്‍പ്പെടെ 15 പേരെ കൊലപ്പെടുത്തിയ നരഭോജിയാണ് രാജാ കൊളന്ദര്‍. ഇയാളുടെ പേരിലുള്ള ഡയറിയിലെ കാര്യങ്ങള്‍ ഡോക്യുമെന്ററിയില്‍ വെളിപ്പെടുത്തുന്നുണ്ട്. നെറ്റ്ഫ്‌ളിക്‌സിലെ ഇന്ത്യന്‍ പ്രിഡേറ്റര്‍ സീരീസിലെ രണ്ടാം ഭാഗമാണ് ഡയറി ഓഫ് എ സീരിയല്‍ കില്ലര്‍. 

ഇന്ത്യാ ടുഡേ ഒറിജിനല്‍ ഈ വര്‍ഷം രണ്ട് ക്രൈം-ഡോക്യുമെന്ററി പരമ്പരകള്‍ പുറത്തിറക്കും. ഇന്ത്യന്‍ പ്രിഡേറ്റര്‍: ഡയറി ഓഫ് എ സീരിയല്‍ കില്ലര്‍, ഡാന്‍സിങ് ഓണ്‍ ദ ഗ്രേവ് എന്നിവയാണ് പുറത്തിറങ്ങുക. ഈ ഡോക്യുമെന്ററി സീരീസുകള്‍ യഥാക്രമം നെറ്റ്ഫ്‌ലിക്‌സിലും ആമസോണ്‍ പ്രൈം വീഡിയോയിലും സ്ട്രീം ചെയ്യും.

സ്ട്രീമിംഗ് പ്ലാറ്റ്‌ഫോമുകളില്‍ നല്ല ഉള്ളടക്കമുള്ള ഡോക്യുമെന്ററികള്‍ കാണുമ്പോള്‍ തങ്ങള്‍ക്ക് അത് വളരെ യുക്തിസഹമായ ഒരു ചുവടുവെയ്പ്പാകുമെന്ന് വ്യക്തമായെന്ന് ഇന്ത്യാ ടുഡേ ഗ്രൂപ്പിന്റെ വൈസ് ചെയര്‍പേഴ്‌സണ്‍ കല്ലി പുരി പറഞ്ഞു. ബ്രേക്കിംഗ് ന്യൂസ് സ്പീഡില്‍ തങ്ങള്‍ ദിവസവും ഇന്ത്യയിലെ ഏറ്റവും മികച്ച കഥകള്‍ പറയുന്നുണ്ട്. പിന്നെ എന്തുകൊണ്ട് കുറച്ചുകൂടി വിശാലമായ രീതിയില്‍ ഈ കഥകള്‍ പറഞ്ഞുകൂടാ എന്ന ചിന്തയുണ്ടായെന്നും മികച്ച ടീമാണ് പിന്നില്‍ പ്രവര്‍ത്തിക്കുന്നതെന്നും കല്ലി പുരി വ്യക്തമാക്കി.