News

കൊച്ചി: പ്രമുഖ സംവിധായകനും നടനുമായ എം.എ. നിഷാദ് കഥയെഴുതി സംവിധാനം ചെയ്യുന്ന ഏറ്റവും പുതിയ ചിത്രം 'ലർക്ക്' (Lurk) ജൂലൈ 24ന് തിയറ്ററുകളിൽ എത്തും. സമകാലിക കേരളം ഏറെ ചർച്ച ചെയ്യുന്ന മനുഷ്യ-മൃഗ സംഘർഷങ്ങളുടെ (Human-Wildlife Conflict) പശ്ചാത്തലത്തിലാണ് ചിത്രം ഒരുക്കിയിരിക്കുന്നത്. മനുഷ്യരുടെയും മൃഗങ്ങളുടെയും ഒളിഞ്ഞിരിക്കുന്ന അതിജീവനത്തിന്റെയും ഭയത്തിന്റെയും കഥയാണ് സിനിമ സംസാരിക്കുന്നത്.

പ്രവാസി വ്യവസായി ആർ. ഹരികുമാർ (Kerala Talkies) സമർപ്പിക്കുന്ന ഈ ചിത്രം ഇതിനോടകം തന്നെ നിരവധി അന്താരാഷ്ട്ര ചലച്ചിത്ര മേളകളിൽ ശ്രദ്ധ നേടുകയും പുരസ്കാരങ്ങൾ കരസ്ഥമാക്കുകയും ചെയ്തിട്ടുണ്ട്. മനോജ് രത്നാകരൻ, അരുൺ കുമാർ ടി.വി എന്നിവരാണ് ചിത്രത്തിന്റെ കോ-പ്രൊഡ്യൂസേഴ്സ്.

കാടിന്റെയും വന്യജീവികളുടെയും പശ്ചാത്തലത്തിൽ ഒരുങ്ങുന്ന ത്രില്ലർ ചിത്രമായതിനാൽ തന്നെ മികച്ച വി.എഫ്.എക്സ് (VFX) സാങ്കേതികവിദ്യയാണ് സിനിമയ്ക്കായി ഉപയോഗിച്ചിരിക്കുന്നത്. ഷിറോ ബ്രദേഴ്സ്, റോഷിൻ ഷിറോ, ഷിബിൻ ഷിറോ എന്നിവരുടെ നേതൃത്വത്തിലാണ് ചിത്രത്തിന്റെ വിഷ്വൽ ഇഫക്ട്സ് കൈകാര്യം ചെയ്തിരിക്കുന്നത്.

മലയാള സിനിമയിലെ ഒരുപിടി മികച്ച ആർട്ടിസ്റ്റുകളാണ് ചിത്രത്തിൽ ഒന്നിക്കുന്നത്. സൈജു കുറുപ്പ്, അജു വർഗീസ് എന്നിവർ പ്രധാന വേഷങ്ങളിൽ എത്തുന്ന ചിത്രത്തിൽ ജാഫർ ഇടുക്കി, സുധീർ കരമന, ടി.ജി. രവി, മഞ്ജു പിള്ള, അനുമോൾ, മുത്തുമണി, വിനോദ് കേടാമംഗലം, സരിത കുക്കു, പ്രശാന്ത് അലക്സാണ്ടർ, സോഹൻ സീനുലാൽ, സ്മിനു സിജോ തുടങ്ങി വൻ താരനിര തന്നെ അണിനിരക്കുന്നുണ്ട്. സംവിധായകൻ എം.എ. നിഷാദും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നു.

എം.എ. നിഷാദിന്റെ കഥയ്ക്ക് ജൂബിൻ ജേക്കബും നിഷാദും ചേർന്നാണ് തിരക്കഥയൊരുക്കിയിരിക്കുന്നത്. രാജീഷ് രാമൻ ഛായാഗ്രഹണവും വിപിൻ മണ്ണൂർ ചിത്രസംയോജനവും നിർവ്വഹിക്കുന്നു. പ്രകാശ് അലക്സ്, മിനീഷ് തമ്പാൻ എന്നിവരാണ് സംഗീതം. വടക്കൻ മലബാറിലെ വനമേഖലയോട് ചേർന്ന് ജീവിക്കുന്ന സാധാരണക്കാരായ മനുഷ്യരുടെ പ്രകൃതിയോടുള്ള പോരാട്ടത്തിന്റെ കഥ പറയുന്ന 'ലർക്ക്' ജൂലൈ 24 മുതൽ 'മാൻ മീഡിയ' (Man Media) തിയറ്ററുകളിലെത്തിക്കും.