Teaser

സുരേഷ് ഗോപിയുടെ ഏറ്റവും പുതിയ ചിത്രമായ പാപ്പന്‍ മികച്ച വിജയത്തിലേയ്ക്ക് മുന്നേറുകയാണ്. റിലീസ് ചെയ്ത് 10 ദിവസം പിന്നിടുമ്പോള്‍ ആഗോള ബോക്‌സ് ഓഫീസില്‍ നിന്ന് പാപ്പന്‍ 31.43 കോടി രൂപ വാരിക്കഴിഞ്ഞു. ആദ്യ ദിനത്തില്‍ 3.16 കോടി രൂപയാണ് പാപ്പന്‍ നേടിയത്. ഇതിനിടയിലാണ് സിനിമയുടെ വിജയാഘോഷത്തിന്‍റെ ഭാഗമായി ഒരു സക്സസ് ടീസര്‍ അണിയറക്കാര്‍ പുറത്തുവിട്ടിരിക്കുന്നത്. നിത പിള്ള അവതരിപ്പിക്കുന്ന എഎസ്‍പി വിന്‍സി എബ്രഹാമും ഷമ്മി തിലകന്‍റെ ഇരുട്ടന്‍ ചാക്കോയും ഒപ്പം സുരേഷ് ഗോപിയുടെ പാപ്പന്‍ കഥാപാത്രവും ടീസറില്‍ കാണാൻ സാധിക്കും.

ഇന്‍വസ്റ്റിഗേഷന്‍ ത്രില്ലര്‍ ചിത്രമായ പാപ്പനില്‍ സുരേഷ് ഗോപി ഗംഭീര തിരിച്ചുവരവാണ് നടത്തിയിരിക്കുന്നതെന്ന് പ്രേക്ഷകര്‍ പറയുന്നു. റിലീസ് ചെയ്ത ആദ്യ ദിനം തന്നെ വലിയ രീതിയില്‍ പ്രേക്ഷകരെ തിയേറ്ററുകളിലേയ്ക്ക് എത്തിക്കാന്‍ സുരേഷ് ഗോപി ചിത്രത്തിന് സാധിച്ചിരുന്നു. ചിത്രത്തില്‍ ആശ ശരത്ത്, കനിഹ, ചന്ദുനാഥ്, വിജയരാഘവന്‍, ടിനി ടോം, ഷമ്മി തിലകന്‍ തുടങ്ങിയവരും കഥാപാത്രങ്ങളായെത്തുന്നു. 

ഒരു ഇടവേളയക്ക് ശേഷം സുരേഷ് ഗോപി വീണ്ടും പോലീസ് കഥാപാത്രത്തെ അവതരിപ്പിക്കുന്നു, മകന്‍ ഗോകുല്‍ സുരേഷും സുരേഷ് ഗോപിയും ഒന്നിക്കുന്നു, നീണ്ട ഇടവേളയ്ക്ക് ശേഷം ജോഷി-സുരേഷ് ഗോപി കോംബോ തുടങ്ങി നിരവധി സവിശേഷതകളുമായാണ് പാപ്പന്‍ പ്രേക്ഷകര്‍ക്ക് മുന്നിലെത്തിയത്. പൊറിഞ്ചു മറിയം ജോസിന്റെ വിജയത്തിനു ശേഷം ജോഷി സംവിധാനം ചെയ്യുന്ന ചിത്രം കൂടിയാണ് പാപ്പന്‍.