Song

കാര്‍ത്തിയെ നായകനാക്കി മുത്തയ്യ രചനയും സംവിധാനവും നിര്‍വ്വഹിക്കുന്ന 'വിരുമന്‍' ബോക്‌സ് ഓഫീസ് കീഴടക്കി മുന്നേറുകയാണ്. 'കൊമ്പന്‍' എന്ന ഹിറ്റ് ചിത്രത്തിന് ശേഷം കാര്‍ത്തിയും മുത്തയ്യയും ഒന്നിച്ച ചിത്രമാണ് 'വിരുമന്‍'. ചിത്രത്തിലെ ഒരു വീഡിയോ ഗാനം പുറത്തുവിട്ടിരിക്കുകയാണ് അണിയറ പ്രവർത്തകർ ഇപ്പോൾ.

'മധുര വീരന്' എന്ന് തുടങ്ങുന്ന ഗാനത്തിന്റെ വീഡിയോ ആണ് പുറത്തുവിട്ടത്. ഗ്രാമ പശ്ചാത്തലത്തിൽ ഒരുക്കിയിരിക്കുന്ന ഗാന രംഗത്ത് അതിഥിയും കാർത്തിയും ഒന്നിച്ചെത്തുന്നുണ്ട്. ഇരുവരുടെയും പാട്ടും ഡാൻസും ഇതിനോടകം ആരാധകരുടെ മനം കവർന്നിട്ടുണ്ട്. മണിക്കൂറുകൾക്കുള്ളിൽ ലക്ഷക്കണക്കിന് കാഴ്ചക്കാരാണ് പാട്ടിനു ലഭിച്ചിരിക്കുന്നത്. 

ആദ്യ ദിനം മാത്രം 8.1 കോടി രൂപയാണ് കാര്‍ത്തി ചിത്രം നേടിയത് . ഇത് കാര്‍ത്തിയുടെ കരിയറിലെ ഏറ്റവും ഉയര്‍ന്ന തുകയാണ്. 2ഡി എന്റര്‍ടെയ്ന്‍മെന്റിന്റെ ബാനറില്‍ സൂര്യയും ജ്യോതികയും നിര്‍മ്മിച്ച ചിത്രത്തില്‍ പ്രശസ്ത സംവിധായകന്‍ ഷങ്കറിന്റെ ഇളയപുത്രി അതിഥി ഷങ്കറാണ് നായിക. രാജ് കിരണ്‍, പ്രകാശ് രാജ്, കരുണാസ് ,സൂരി, ശരണ്യാ പൊന്‍വര്‍ണന്‍ എന്നിവര്‍ക്കൊപ്പം തെന്നിന്ത്യന്‍ സിനിമയിലെ നിരവധി പ്രമുഖ അഭിനേതാക്കളും അഭിനയിക്കുന്ന 'വിരുമന്‍' ഗ്രാമീണ പശ്ചാത്തലത്തിലുള്ള ആക്ഷന്‍ എന്റര്‍ടൈയ്നര്‍ ചിത്രമാണ്.

എസ്.കെ. ശെല്‍വകുമാര്‍ ഛായഗ്രഹണം നിര്‍വ്വഹിക്കുന്നു. യുവന്‍ ഷങ്കര്‍ രാജ സംഗീതം പകരുന്നു. അനല്‍ അരശാണ് സാഹസികമായ സംഘടന രംഗങ്ങള്‍ ഒരുക്കിട്ടുള്ളത്. സഹ നിര്‍മ്മാതാവ്- രാജശേഖര്‍ കര്‍പ്പൂര സുന്ദരപാണ്ഡ്യന്‍. പി ആര്‍ ഒ-എ എസ് ദിനേശ്.