Song

സുരേഷ് ​ഗോപി- ജോഷി കൂട്ടുകെട്ടിൽ തിയറ്ററിലെത്തി ​ഗംഭീര വിജയം സ്വന്തമാക്കി കൊണ്ടിരിക്കുന്ന പാപ്പന്റെ വീഡിയോ സോം​ഗ് പുറത്തുവിട്ടു. 'മായാമഞ്ഞിൻ' എന്ന് തുടങ്ങുന്ന ​ഗാനമാണ് പുറത്തുവിട്ടിരിക്കുന്നത്. മനു മഞ്ജിത്ത് എഴുതിയ വരികൾക്ക് സം​ഗീതം നൽകിയിരിക്കുന്നത് ജേക്സ് ബിജോയ് ആണ്. ലിബിൻ സ്കറിയ ആണ് ​ഗാനം ആലപിച്ചിരിക്കുന്നത്. 

ജൂലൈ 29നാണ് സിനിമാസ്വാദകർ ഏറെ പ്രതീക്ഷയോടെ കാത്തിരുന്ന പാപ്പൻ പ്രേക്ഷകർക്ക് മുന്നിലെത്തിയത്. ഇതിനോടകം 40 കോടിയിലധികം കളക്ഷനാണ് ചിത്രം ബോക്സ് ഓഫീസിൽ നിന്നും സ്വന്തമാക്കിയിരിക്കുന്നത്. 'സലാം കാശ്‍മീരി'ന് ശേഷം ജോഷി- സുരേഷ് ​ഗോപി കൂട്ടുകെട്ടിൽ എത്തിയ പാപ്പൻ മലയാള സിനിമയ്ക്ക് തന്നെ വലിയൊരു മുതൽക്കൂട്ടായി മാറിയിരിക്കുകയാണ്.

സുരേഷ് ​ഗോപിയുടെ കരിയറിലെ 252-ാം ചിത്രം കൂടിയാണ് പാപ്പൻ. ഒരിടവേളക്ക് ശേഷം സുരേഷ് ​ഗോപി പൊലീസ് വേഷത്തിലെത്തിയ ചിത്രത്തിൽ എബ്രഹാം മാത്യു മാത്തന്‍ എന്ന കഥാപാത്രത്തെയാണ് നടൻ അവതരിപ്പിച്ചത്. പൊറിഞ്ചു മറിയം ജോസിനു ശേഷം ജോഷിയുടെ സംവിധാനത്തില്‍ എത്തുന്ന ചിത്രവുമാണ് പാപ്പന്‍. ​ഗോകുൽ സുരേഷും ചിത്രത്തിൽ പ്രധാന കഥാപാത്രത്തെ അവതരിപ്പിച്ചിരുന്നു. ​ഗോകുലും സുരേഷ് ​ഗോപിയും ആദ്യമായി സ്ക്രീനിൽ ഒന്നിച്ചെത്തിയ ചിത്രം കൂടി ആയിരുന്നു ഇത്. 

ഗോകുലം ഗോപാലൻ, ഡേവിഡ് കാച്ചപ്പിള്ളി, റാഫി മതിര എന്നിവർ ചേർന്നാണ് ചിത്രം നിര്‍മ്മിച്ചിരിക്കുന്നത്. ഗോകുലം മൂവീസും ഡ്രീം ബിഗ് ഫിലിംസും ചേർന്നാണ് ചിത്രം തീയേറ്ററുകളിൽ എത്തിക്കുന്നത്. ക്രൈം ത്രില്ലര്‍ വിഭാഗത്തില്‍ പെടുന്ന ചിത്രത്തില്‍ നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവന്‍, ടിനി ടോം, ഷമ്മി തിലകന്‍, സണ്ണി വെയ്ന്‍ തുടങ്ങിയവരും മുഖ്യ വേഷങ്ങളിൽ എത്തി. ചിത്രത്തിലെ നീത പിള്ളയുടെ വിന്‍സി എന്ന കഥാപാത്രം ഏറെ ശ്രദ്ധ നേടിയിരുന്നു.