Trailer

കമ്മാരസംഭവത്തിന് ശേഷം മുരളി ​ഗോപിയുടെ രചനയിൽ രതീഷ് അമ്പാട്ട് സംവിധാനം ചെയ്യുന്ന പൃഥ്വിരാജ് ചിത്രം 'തീർപ്പ്' ന്റെ ട്രെയ്‌ലർ പുറത്തിറക്കി. ചിത്രത്തിന്‍റെ കഥാ പശ്ചാത്തലം പറയാതെ അത്യന്തം ആകാംഷ നിറക്കുന്ന രീതിയിലാണ് 2.41 മിനിറ്റ് ദൈര്‍ഘ്യമുള്ള ട്രെയ്‌ലർ ഇറക്കിയിരിക്കുന്നത്. ലോകമെമ്പാടുമുള്ള തിയറ്ററുകളിൽ  ഓ​ഗസ്റ്റ് 25ന് ചിത്രം റിലീസ് ചെയ്യും. ഇന്ദ്രജിത്ത്, സൈജു കുറുപ്പ്, വിജയ് ബാബു,മുരളി ​ഗോപി, ഇഷ തൽവാർ  എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. 

ഫ്രൈഡേ ഫിലിം ഹൗസും സെല്ലുലോയ്ഡ് മാർ​ഗും ചേർന്നാണ് ചിത്രം നിർമിക്കുന്നത്. സുനിൽ കെ.എസ് ഛായാ​ഗ്രഹണം നിർവഹിക്കുന്നു. മുരളി ​ഗോപി തന്നെയാണ് ​ഗാനരചനയും സം​ഗീതസംവിധാനവും. മുരളി ​ഗോപി ആദ്യമായി സം​ഗീതസംവിധാനം നിർവഹിക്കുന്ന ചിത്രം കൂടിയാണിത്. ​ഗോപി സുന്ദറാണ് പശ്ചാത്തലസം​ഗീതം.‘വിധിതീർപ്പിലും പകതീർപ്പിലും ഒരുപോലെ കുടിയേറിയ ഇരുതലയുള്ള ആ ഒറ്റവാക്ക്: തീർപ്പ്’... എന്നതാണ് ചിത്രത്തിന്റെ ടാഗ്‍ലൈൻ. 

കമ്മാരസംഭവത്തിനു ശേഷം മുരളി ​ഗോപിയുടെ തിരക്കഥയിൽ രതീഷ് അമ്പാട്ട് സംവിധാനം ചെയ്യുന്ന ചിത്രമെന്ന നിലയിൽ ഏറെ ആകാംക്ഷയോടെയാണ് പ്രേക്ഷകർ ഈ ചിത്രത്തെ കാത്തിരിക്കുന്നത്.2021-ൽ ചിത്രീകരണമാരംഭിച്ച ചിത്രം പൂർത്തിയാക്കാൻ ഏകദേശം ഒന്നര വർഷമെടുത്തു. ലൂസിഫറിനു ശേഷം മുരളി ഗോപി തിരക്കഥ എഴുതുന്ന ചിത്രമെന്ന പ്രത്യേകതയും തീർപ്പിനുണ്ട്.