Trailer

ഫഹദ് ഫാസിലിനെ നായകനാക്കി നവാഗതനായ സജിമോന്‍ പ്രഭാകര്‍ സംവിധാനം ചെയ്ത 'മലയന്‍കുഞ്ഞ്' എന്ന ചിത്രത്തിന്റെ രണ്ടാം ട്രെയ്‌ലർ പുറത്തിറക്കി. കാണികളുടെ ഉള്ളിൽ ഉത്കണ്ഠയും ആവേശവും നിറയ്ക്കുന്ന ട്രെയ്‌ലറാണ് പുറത്തുവന്നിരിക്കുന്നത്. 

ചിത്രം തിയറ്ററുകളില്‍ എത്താനിരിക്കേ ഇതാ ഒരു മുന്നറിയിപ്പ് നല്‍കിയിരിക്കുകയാണ് 'മലയൻകുഞ്ഞ് ടീം'. 'നിങ്ങൾ ക്ലോസ്‍ട്രോഫോബിയ നേരിടുന്ന ഒരു വ്യക്തി ആണെങ്കിൽ ഞങ്ങളുടെ ചിത്രം കാണുന്നതിന് മുൻപ് സൂക്ഷിക്കുക' എന്ന മുന്നറിയിപ്പോടുകൂടിയ പോസ്റ്ററാണ്‌ സോഷ്യൽ മീഡിയയിലൂടെ പുറത്തുവിട്ടിരിക്കുന്നത്‌. ഫഹദ് ഫാസിലും ഈ പോസ്റ്റര്‍ പങ്കുവെച്ചിട്ടുണ്ട് (Malayankunju). പരിമിതമായ ഇടങ്ങളിലും അടഞ്ഞ സ്ഥലങ്ങളിലുമൊക്കെ പരിഭ്രാന്തത ഉണർത്തുന്ന ഒരു മാനസികാവസ്ഥയെയാണ് ക്ലോസ്‍ട്രോഫോബിയ എന്ന് വിളിക്കുന്നത്. സമൂഹത്തിൽ 12.5 ശതമാനത്തോളം ആൾക്കാർക്ക് ചെറുതും വലുതുമായുള്ള രീതിയിൽ അനുഭവിക്കുന്ന ഒരു മാനസികാവസ്ഥ കൂടിയാണിത്. അതുകൊണ്ട് ഈ മുന്നറിയിപ്പ് മനസിലാക്കി അത് നേരിടാൻ താല്‍പര്യമുള്ളവർ മാത്രം സിനിമ കാണുക എന്നാണ് അണിയറപ്രവർത്തകർ പങ്കുവയ്ക്കുന്നത്. 

പ്രഖ്യാപന നാൾ മുതല്‍ തന്നെ വലിയ രീതിയില്‍ പ്രേക്ഷകശ്രദ്ധ ആകര്‍ഷിച്ച ചിത്രമാണ് മലയന്‍കുഞ്ഞ്. സെന്‍സറിംഗ് പൂര്‍ത്തിയാക്കിയ ചിത്രത്തിന് യു സര്‍ട്ടിഫിക്കറ്റ് ആണ് ലഭിച്ചിരിക്കുന്നത്. ട്രാന്‍സിന് ശേഷം ഫഹദ് ഫാസിലിന്റേതായ ഒരു ചിത്രം തിയേറ്ററില്‍ എത്തിയിട്ടില്ല. നാല് ചിത്രങ്ങള്‍ ഒടിടിയില്‍ എത്തിയിരുന്നു. ഇതിനിടെ പുഷ്പ, വിക്രം തുടങ്ങിയ സൂപ്പര്‍ ഹിറ്റ് പാന്‍ ഇന്ത്യന്‍ ചിത്രങ്ങളില്‍ ഫഹദ് പ്രധാന കഥാപാത്രങ്ങളെ അവതരിപ്പിക്കുകയും ചെയ്തു. 

രജിഷ വിജയന്‍ നായികയാവുന്ന ചിത്രത്തില്‍ ഇന്ദ്രന്‍സ്, ജാഫര്‍ ഇടുക്കി, ദീപക് പറമ്പോല്‍ തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. ജൂലൈ 22ന് ചിത്രം തിയറ്ററുകളില്‍ എത്തും. മഹേഷ് നാരായണനാണ് ചിത്രത്തിന്റെ രചനയും ഛായാഗ്രഹണവും നിര്‍വഹിച്ചിരിക്കുന്നത്. ഫാസില്‍ നിര്‍മ്മിക്കുന്ന ചിത്രം എന്ന പ്രത്യേകതയുമുണ്ട്. എ.ആര്‍ റഹ്‌മാന്‍ സംഗീതം പകരുന്നു എന്നതും ചിത്രത്തിന്റെ പ്രത്യേകതയാണ്. 

എഡിറ്റിംഗ് അര്‍ജു ബെന്‍, പ്രൊഡക്ഷന്‍ ഡിസൈന്‍ ജ്യോതിഷ് ശങ്കര്‍, പ്രൊഡക്ഷന്‍ കണ്‍ട്രോളര്‍ ബെന്നി കട്ടപ്പന, സൗണ്ട് ഡിസൈന്‍ വിഷ്ണു ഗോവിന്ദും ശ്രീശങ്കറും ചേര്‍ന്ന്, സിങ്ക് സൗണ്ട് വൈശാഖ് പി വി, മേക്കപ്പ് രഞ്ജിത്ത് അമ്പാടി, വസ്ത്രാലങ്കാരം ധന്യ ബാലകൃഷ്ണന്‍, സെഞ്ചുറി റിലീസ് തിയറ്ററുകളിലെത്തിക്കും.