News

പുതിയ സിനിമയുടെ പ്രൊമോഷനുമായി ബന്ധപ്പെട്ട് കൊച്ചിയിലെത്തിയ നടനും വ്യവസായ പ്രമുഖനുമായ ശരവണൻ അരുലിന്റെ വിശേഷങ്ങളാണ് സോഷ്യൽമീഡിയയിൽ വൈറാലായി മാറുന്നത്. കൊച്ചി വിമാനത്താവളത്തിൽ നിന്നും യുവാക്കൾ ബുള്ളറ്റിൽ അകമ്പടിയോടെയെത്തിയാണ് അരുളിനെ വരവേറ്റത്. വെറും അകമ്പടി മാത്രമായിരുന്നില്ല ആഡംബരക്കാറിന് മുന്നിൽ അകമ്പടിക്കെത്തിയ  യുവാക്കൾ ധരിച്ചിരുന്നത് അരുളിന്റെ കന്നി ചിത്രമായ ലെജന്റിന്റെ ടീഷർട്ട് ആണ്. 

നടി ലക്ഷ്മി റായ് അടക്കമുള്ള നടിമാരും താരത്തിനൊപ്പം കൊച്ചിയിലെത്തി. തമിഴ്നാട്ടിൽ കോടികൾ വിറ്റുവരവുള്ള ശരവണ സ്റ്റോഴ്സിന്റെ അമരക്കാരനാണ് അരുൾ. 

നടിയും മോഡലും 2015 മിസ് യൂണിവേഴ്സ് മത്സരത്തിലെ ഇന്ത്യൻ പ്രതിനിധിയുമായിരുന്ന ഉർവശി റൗട്ടേലയാണ് ചിത്രത്തിലെ നായിക. മോഡൽ ഗീതിക തിവാരിയും ചെയ്തത്രത്തിൽ അഭിനയിക്കുന്നു. ലക്ഷ്മി റായി ഒരു ഗാനരംഗത്തിലും എത്തുന്നു. അന്തരിച്ച നടൻ വിവേക് അവസാനമായി അഭിനയിച്ച ചിത്രങ്ങളിലൊന്നാണ് ലെജൻഡ്.  ലെജൻഡ് ശരവണനൊപ്പം മുഖ്യകഥാപാത്രങ്ങളായി പ്രഭു, യോഗി ബാബു, തമ്പി രാമയ്യ, വിജയകുമാർ, നാസർ, മയിൽസാമി, കോവൈ സരള, മൻസൂർ അലിഖാൻ എന്നിങ്ങനെ താരങ്ങളുടെ നീണ്ട നിരയുണ്ട്. ‘ശിവാജി’യിലെപ്പോലെ സുമൻ തന്നെയാണു വില്ലൻ. 

മലയാളത്തിൽ നിന്ന് ഹരീഷ് പേരടിയും ചിത്രത്തിലുണ്ട്. ജെറി, ജോസഫ് ഡി, സാമി എന്നിവര്‍ ചേര്‍ന്ന് സംവിധാനം ചെയ്യുന്ന ചിത്രത്തിന്റെ കഥയൊരുക്കിയിരിക്കുന്നത് പാട്ടുക്കോട്ടൈ പ്രഭാകരനാണ്. ഹാരിസ് ജയരാജാണ് സംഗീതം ഒരുക്കിയിരിക്കുന്നത്.