News

ട്രെയിലര്‍ പുറത്തിറങ്ങിയതോടെ ചിത്രം വിവാദത്തിലായിരുന്നു. സ്വവര്‍ഗ ലൈംഗികതയെ കുറിച്ച് ശക്തമായി സിനിമയില്‍ പ്രതിപാദിക്കുന്നതായി ട്രെയ്‌ലറില്‍ നിന്ന് മനസിലാക്കാന്‍ സാധിക്കും. ബാല്യം മുതല്‍ പ്രണയിക്കുന്ന രണ്ടു പെണ്‍കുട്ടികള്‍ വര്‍ഷങ്ങള്‍ക്കു ശേഷം വീണ്ടും കണ്ടുമുട്ടുമ്പോള്‍ ഉണ്ടാകുന്ന വൈകാരിക മുഹൂര്‍ത്തങ്ങളിലൂടെയാണ് ചിത്രം മുന്നോട്ട് പോകുന്നത്. 

ഇപ്പോള്‍ ഇതാ മലയാളത്തിലെ ആദ്യത്തെ ലെസ്ബിയന്‍ സിനിമ ഹോളിവൂണ്ടില്‍ അഭിനയിച്ചതിനെക്കുറിച്ച് പറഞ്ഞുള്ള ജാനകിയുടെ അഭിമുഖം ശ്രദ്ധേയമായിക്കൊണ്ടിരിക്കുകയാണ്. ലെസ്ബിയന്‍ എന്നതിനെ കുറിച്ച് ആളുകള്‍ ഇപ്പോള്‍ മനസിലാക്കുന്നുണ്ടെന്ന് ജാനകി പറഞ്ഞു. ഹോളി വൂണ്ടില്‍ അഭിനയിച്ചത് സ്വന്തം തീരുമാനമാണ്. നായികയായി അഭിനയിക്കണമെന്ന് ആഗ്രഹമുണ്ടെന്നും അതിനാല്‍ രണ്ടും കല്‍പ്പിച്ചാണ് ഇത്തരത്തിലൊരു തീരുമാനമെടുത്തതെന്നും ജാനകി കൂട്ടിച്ചേര്‍ത്തു. 

ലിപ് ലോക്കും ബെഡ്‌റൂം രംഗങ്ങളും ഉള്‍പ്പെടെ ചിത്രത്തിലുണ്ട്.  ജീവിതത്തിലാദ്യമായാണ് ഒരു പെണ്ണിനെ ചുംബിക്കുന്നത്. ഇത് ചെയ്താല്‍ ശരിയാകുമോ എന്ന ആശങ്കയുണ്ടായിരുന്നു. ക്യാമറയ്ക്ക് മുന്നില്‍ നില്‍ക്കുമ്പോള്‍ കലയാണ് ജാനകിയല്ലെന്നും താരം പറഞ്ഞു. 

തനിക്ക് കാണിക്കാന്‍ പറ്റുന്ന ഭാഗങ്ങളാണ് കാണിച്ചിട്ടുള്ളതെന്നും ലിമിറ്റേഷന് ഉള്ളില്‍ നില്‍ക്കുന്ന കാര്യങ്ങളാണ് ചെയ്തതെന്നും ജാനകി പറഞ്ഞു. സ്വന്തമായി തിരഞ്ഞെടുത്ത കഥാപാത്രമായതിനാല്‍ അതിനോട് നീതി പുലര്‍ത്തേണ്ടതുണ്ട്. അപ്പോള്‍ മറ്റുള്ളവര്‍ എന്ത് പറയുന്നു എന്ന് നോക്കാറില്ല. കോണ്‍ഫിഡന്‍സ് ഉണ്ടെങ്കില്‍ ഇത്തരം റോളുകള്‍ ചെയ്യാം. ഇന്റര്‍നാഷണല്‍ സിനിമകളില്‍ ഇത്തരം രംഗങ്ങള്‍ കാണാം. മലയാളത്തില്‍ ചെയ്യുമ്പോള്‍ എന്താണ് പ്രശ്‌നമെന്നും ജാനകി ചോദിച്ചു. 

ഇത് ഫുള്‍ കളിയാണോ എന്ന് പലരും ചോദിച്ചിരുന്നെന്ന് ജാനകി പറഞ്ഞു. അത് കാണാനായെങ്കിലും ആളുകള്‍ സിനിമ കാണും. കഥാപാത്രത്തെ കുറിച്ച് പറഞ്ഞപ്പോള്‍ ഫാമിലിയില്‍ കുറച്ച് പ്രശ്‌നങ്ങളുണ്ടായിരുന്നു. സുഹത്തുക്കളാണ് ഒപ്പം നിന്നത്. സെറ്റിലൊക്കെ വന്നതിന് ശേഷമാണ് അമ്മയ്ക്ക് കാര്യങ്ങള്‍ മനസിലായതെന്നും ഇിനിയും ഇതുപോലെയുള്ള ക്യാരക്ടേഴ്‌സ് തേടി വരുമെന്നും ജാനകി വ്യക്തമാക്കി.