777 ചാര്ളി 150 കോടി ക്ലബ്ബില്. ലാഭ വിഹിതം 10% സഹപ്രവര്ത്തകര്ക്ക്
|
|
Written By
|
News
രക്ഷിത് ഷെട്ടി നായകനായെത്തിയ '777 ചാര്ളി' തിയേറ്ററുകളില് മികച്ച പ്രേക്ഷക പ്രതികരണം നേടി പ്രദര്ശനം തുടരുകയാണ്. ചാര്ളി വെറുമൊരു സിനിമ മാത്രമല്ല വികാരമാണ് എന്നാണ് പ്രേക്ഷകര് പറയുന്നത്. ഐ.എം.ഡി.ബി.യുടെ ജൂണ് മാസത്തെ ഏറ്റവും പ്രേക്ഷക പ്രതീക്ഷയുള്ള ഇന്ത്യന് സിനിമകളുടെ ലിസ്റ്റില് ഏറ്റവുമധികം പോളിംഗ് ലഭിച്ച ചിത്രമായി 777 ചാര്ളി മാറിയിരുന്നു.
ഇപ്പോള് ഇതാ ചിത്രം 150 കോടി ക്ലബ്ബില് ഇടംപിടിച്ചിരിക്കുകയാണ്. റിലീസ് ചെയ്ത് 27 ദിവസം പിന്നിട്ടപ്പോഴാണ് 777 ചാര്ളി ബോക്സ് ഓഫീസില് 150 കോടി കളക്ഷന് നേടിയത്. ലാഭ വിഹിതം തനിയ്ക്ക് മാത്രമായി വേണ്ടെന്നും പത്ത് ശതമാനം ചിത്രത്തില് ഒപ്പം പ്രവര്ത്തിച്ചവര്ക്ക് നല്കുമെന്നും നടനും സംവിധായകനുമായ രക്ഷിത് ഷെട്ടി അറിയിച്ചു.
ചിത്രത്തില് നിന്ന് കിട്ടുന്ന ലാഭത്തിന്റെ 5 ശതമാനം തുക രാജ്യത്തെ നായകള്ക്കും മൃഗങ്ങള്ക്കും വേണ്ടി പ്രവര്ത്തിക്കുന്ന എന്ജിഒകള്ക്ക് നല്കുമെന്ന് രക്ഷിത് ഷെട്ടി അറിയിച്ചിരുന്നു. ചിത്രത്തിലെ പ്രധാന കഥാപാത്രമായ ചാര്ളി എന്ന നായയുടെ പേരിലാണ് മൃഗസംരക്ഷണത്തിന് ധനസഹായം നല്കുക.
777 ചാര്ലി ഒരു സാഹസിക കോമഡി ഡ്രാമയാണ്. ചിത്രത്തില് രക്ഷിത് ഷെട്ടി, സംഗീത ശൃംഗേരി, രാജ് ബി ഷെട്ടി, ഡാനിഷ് സെയ്ത്, ബോബി സിംഹ എന്നിവര് പ്രധാന കഥാപാത്രങ്ങളെ അവതരിപ്പിക്കുന്നു. പരംവ സ്റ്റുഡിയോസിന് കീഴില് രക്ഷിത് ഷെട്ടിയും ജിഎസ് ഗുപ്തയും ചേര്ന്നാണ് ചിത്രം നിര്മ്മിച്ചത്.
എല്ലാ മൃഗങ്ങള്ക്കും, പ്രത്യേകിച്ച് നായ പ്രേമികള്ക്കും വേണ്ടിയുള്ള സിനിമയാണിത്. മനുഷ്യനും വളര്ത്തു നായയും തമ്മിലുള്ള ആത്മബന്ധം വളരെ മനോഹരമായി 777 ചാര്ലിയില് ചിത്രീകരിക്കുന്നു. കന്നഡ, തമിഴ്, തെലുങ്ക്, മലയാളം, ഹിന്ദി എന്നീ ഭാഷകളിലാണ് ചിത്രം പുറത്തിറങ്ങിയത്.
Related Stories
See All
Latest Update
