ഷാർജ: യു.എ.ഇയിലെ പ്രമുഖ സാംസ്കാരിക പ്രവർത്തകനും വ്യവസായിയുമായ ഡോ. നാസർ വാണിയമ്പലം രചിച്ച “സ്നേഹത്തിന്റെ ഹൃദയ വഴികൾ” എന്ന പുസ്തകത്തിന്റെ പ്രകാശനവും ചർച്ചയും തിങ്കളാഴ്ച വൈകുന്നേരം 8 മണി മുതൽ 9 മണിവരെ ഷാർജ ഇന്റർനാഷണൽ ബുക്ക് ഫെയറിലെ ഇന്റലക്ച്വൽ ഹാളിൽ വെച്ച് നടക്കും.

യു.എ.ഇയിലെയും ഇന്ത്യയിലെയും പ്രമുഖ വ്യക്തിത്വങ്ങൾ ഈ ചടങ്ങിൽ പങ്കെടുക്കും.
യു.എ.ഇ മുൻ മന്ത്രി, യു.എൻ അംബാസഡർ ഡോ. മുഹമ്മദ് സഈദ് അൽ കിന്ദി, പ്രമുഖ യു.എ.ഇ എഴുത്തുകാരൻ അഹമ്മദ് ഇബ്രാഹിം, ഡോ. മുഹമ്മദ് ഹംദാൻ ബിൻ ജറാഷ് (Cultural Advisor, Emirates Creativity Association), നജീബ് അബ്ദുല്ല അൽ ശംസി (Former Director General, Higher Investment Authority of GCC) എന്നിവർ ഉൾപ്പെടെ നിരവധി പ്രമുഖ അറബ്, ഇന്ത്യൻ വ്യക്തിത്വങ്ങൾ ചടങ്ങിൽ സംബന്ധിക്കും.

പ്രസ്തുത പരിപാടിയിൽ ഷാർജ ഇന്ത്യൻ അസോസിയേഷൻ പ്രസിഡന്റ് നിസാർ തളങ്കര, വി. ടി. സലീം, ഹാഷിം നൂഞ്ഞേരി, ഷെരീഫ് കാരശ്ശേരി, സി.എം.എ കബീർ മാസ്റ്റർ, സയ്യിദ് ഹൈദ്രോസ് തങ്ങൾ, റഷ്‌ദി ബിൻ റഷീദ്, മുനീർ മൂഹിയുദ്ദീൻ, വൈ. എ. റഹീം തുടങ്ങിയ പ്രമുഖർ പങ്കെടുക്കും.

മൂന്ന് പതിറ്റാണ്ടിലേറെകാലമായി പ്രവാസലോകത്ത്, പ്രത്യേകിച്ച് യു.എ.ഇയിലെ സാംസ്കാരിക-സാമൂഹിക രംഗങ്ങളിൽ സജീവമായ വ്യക്തിത്വമാണ് ഡോ. നാസർ വാണിയമ്പലം. ഷാർജ ഇന്റർനാഷണൽ ബുക്ക് ഫെയറിലൂടെയും നിരവധി സാംസ്കാരിക സ്ഥാപനങ്ങളിലൂടെയും എഴുത്തുകാരെയും പ്രസാധകരെയും പ്രചോദിപ്പിച്ചിട്ടുള്ള അദ്ദേഹം, ഇപ്പോൾ തന്റെ ആദ്യ കൃതിയായ “സ്നേഹത്തിന്റെ ഹൃദയ വഴികൾ” പുറത്തിറക്കുകയാണ്.

പുസ്തകത്തിന്റെ അവതാരിക പ്രശസ്ത നോവലിസ്റ്റും കേന്ദ്ര സാഹിത്യ അക്കാദമി അവാർഡ് ജേതാവുമായ പി. സുരേന്ദ്രൻ എഴുതിയതാണ്. പ്രവാസലോകത്തിലെ ശ്രദ്ധേയ എഴുത്തുകാരനായ കെ.വി.കെ. ബുഖാരി എഡിറ്റ് ചെയ്തിരിക്കുന്ന പുസ്തകം ലിപി പബ്ലിക്കേഷൻസ് ആണ് പ്രസിദ്ധീകരിച്ചിരിക്കുന്നത്.